WIEGELIEDJIE (Doedoe kindjie, doedoe)

Woorde: EMANUEL DE ROUBAIX
Musiek: HANS ENDLER; verwerk: G.G. CILLIÉ

Doedoe kindjie, doedoe.
Die sonneskyn het verdwyn
en spelery is verby;
daarom kindjie, doedoe!

Doedoe kindjie, doedoe.
Die bok en skaap het gaan slaap,
maar kat en hond loop nou rond;
daarom kindjie, doedoe!

Doedoe kindjie, doedoe.
Die hoenderhaan toe-oog staan,
Maar katoog-uil hoor ek huil;
daarom kindjie, doedoe!

Doedoe kindjie, doedoe.
Die liewe maan kom al aan
en daarvan ver roep die ster:
Kom nou kindjie, doedoe.