O, GLO MY

Woorde: B. KOK
Musiek: "Believe me, if all those endearing young charms", Ierse Volkswysie; verwerk: DIRKIE DE VILLIERS

O glo my, as frisheid so jeugdig en fraai,
soos jou skoonheid wat ek nou betrag,
sou verwelk soos 'n roostuin deur winde verwaai
en ontdaan van sy luister en prag;
sou ek jou steeds aanbid en met teerheid bemin,
laat jou lieflikheid kwyn en verflou;
in my hart bly jy nogtans my skoon koningin,
al my liefde gewy net aan jou.

Dis nie slegs wanneer sonnige glans jou omhul
en geen trane jou wange ontwy,
dat ek vol verlange my trou sal vervul
en my liefdesgloed tydloos bely.
Ware liefde gedy, onbelemmer en bly,
en verloor nooit sy frisheid en fleur;
maar behou steeds sy egtheid, onskendbaar en vry,
soos 'n blom in die lente sy geur.