LAND, VOLK EN TAAL

Woorde: A.G. VISSER; gewysig: P. MCLACHLAN
Musiek: "Finlands Wald"; verwerk: H. PIETER VAN DER WESTHUIZEN, 1976

Land van die eike met heldergroen lower,
ruisende graanveld en perlende wyn,
waar elke môre met sonnegoud tower,
skitt'rend die Suiderkruis nagliks verskyn.
O, heerlik sonnig Land, aan u gasvrye strand
bring ek die hulde van hart en verstand,
O, heerlik sonnig Land, aan u gasvrye strand
bring ek die hulde van hart en verstand.

Volk uit die helde van eeue gebore,
duldend geen dwingland, gehard in gevaar,
waardig die vaders, die Geus, Hugenote--
wie kan u dade van durf ewenaar?
O, stoere Voorgeslag, aan mannemoed en krag
bring ons nou dankbare hulde vandag,
O, stoere Voorgeslag, aan mannemoed en krag
bring ons nou dankbare hulde vandag.

Taal van my Moeder, geleer as my eie,
staamlend gelispel as kind aan haar knie,
wat ek geglo het, bemin en gely het
ruis in u klanke as 'n soet melodie.
O, dierbaar Moedertaal, as eens my dag ook daal
hoor ek u nog weer vir laas, liefste taal,
O, dierbaar Moedertaal, as eens my dag ook daal
hoor ek u nog weer vir laas, laaste maal.