MY GOEIE KAMERAAD

Woorde: G.G. CILLIÉ
Musiek: "Der gute Kamerad", Duitse Volkswysie; verwerk: DIRKIE DE VILLIERS

Ons was geswore makkers,
ons het oral saam gestry;
die vaderland was in beleg
en sy aan sy het ons geveg
om hom weer te bevry,
om hom weer te bevry.

Hy het langs my gesneuwel
want 'n koeël het hom deurboor.
Die swaarste laste moes hy dra,
die hoogste offer is gevra;
my vriend het ek verloor,
my vriend het ek verloor.

Met eer gee hy sy lewe
as 'n laaste offerdaad.
Daar was geen tyd vir afskeidsgroet,
maar eenmaal sal ons weer ontmoet;
nou rus my kameraad,
my goeie kameraad.